#I am for Sex Education. – ભદ્રાયુ વછરાજાની
તમે શિક્ષક છો, તમે માતા પિતા છો ? તમે OMG 2 જોયું ? ન જોયું હોય તો સત્વરે જુઓ. છેલ્લા થોડા દિવસોથી સિનેમાઘરની અંદર સારી એવી ભીડ ઉભી કરનારું એક પિક્ચર છે OMG 2.
આપણને પહેલું OMG યાદ છે, જેની અંદર બધા જ દેવ દેવીઓની લાક્ષણિક અદામાં પ્રસ્તુતિ કરવામાં આવી હતી. કેટલાક લોકોને એમાં વાંધો પણ પડ્યો હતો પણ એવી વાતો રજૂ કરી હતી કે જેને આપણે નકારી શકીએ એમ નહોતા એટલે મૂંગા થઇ ગયા હતા. પરંતુ આ OMG 2 એના કરતા સાવ જુદું છે, એને કોઈ રીતે નંબર 2 કહેવાય એવું નથી અને મને તો પહેલાં કરતાં પણ આ OMG 2 સદિશ અને સારું લાગ્યું છે. અંગત ગણાતા આપણી sexuality ના એક જ્વલનશીલ મુદ્દાને સમાજ સમક્ષ સ્પષ્ટ કરવાનો ઘણો સારો પ્રયાસ થયો છે એવું મને લાગે છે.
આજથી લગભગ આડત્રીસેક વર્ષ પહેલાં Sex Education વિષય ઉપર ડોક્ટરેટ કરનારો હું પ્રથમ ભારતીય હતો એ સમયે મેં જે વિચારેલું અને જે મેં મારી થીસીસમાં લખેલું તે એક પિક્ચર આજે જાહેરમાં કહી રહ્યું છે. અને મારી દ્રષ્ટિએ બહુ જ ગંભીર વિષયની હળવાશથી અથવા તો નિર્દોષતાથી રજુઆત થઈ છે.
ભગવાન મહાકાલનો એક અણઘડ ભક્ત જેને ખબર નથી કે, હસ્તમૈથુન એટલે શું ? એ પોતે આ હસ્તમૈથુનનું શાસ્ત્ર ઉકેલવા માટે પ્રાચીન કાળની ચોપડીઓમાંથી ઊંડાણથી પસાર થાય છે અને પોતે પોતાના દીકરાનો કેસ લડવા પોતે વકીલ બને છે અને તેમાંથી એક સુંદર ફિલ્મ સર્જાઈ છે.
આપણે લોકો સેક્સના નામે બધા જ પ્રકારના ઢંગધડા વગરના કૃત્યો અથવા તો કાવતરાઓ મૂંગે મોઢે સહી લેનારા છીએ પણ સેક્સ એજ્યુકેશન ના નામે આપણા ઉગતા બાળકોને અથવા તરુણ તરૂણીઓને સાચી હકીકત કહેવાની વાત આવે ત્યારે આપણે બધા પાછળ પડીએ છીએ. આજે પણ લગભગ લગભગ મા બાપ આ વિષય અંગે સ્પષ્ટતા કરતા નથી. શિક્ષકો તો કેટલાક પ્રાણીઓ અને પક્ષીઓના સર્જનની આકૃતિઓ અથવા વાત આવે તો એને ઠેકાડી દેતા હોય છે. આપણે ત્યાં, ખાસ કરીને ગુજરાતમાં, જે સેક્શ્યુઅલ મિસબિહેવીયર ના કિસ્સાઓ બની રહ્યા છે એનું કારણ એ છે કે આપણે આપણા બાળકોને સેક્સનું વિજ્ઞાન શીખવ્યું નથી. મારી એક બહુ પ્રચલિત હાઈપોથિસિસ જે મારા સંશોધન દરમ્યાન ઘડાઈ હતી અને એનો ઉપયોગ પછી ઘણા લોકોએ કર્યો એ એ છે કે, ‘તમે જેનું વિજ્ઞાન શીખવતા નથી તેની વિકૃતિ સંતાન આપોઆપ શીખી જાય છે.’ આ હાઈપોથિસિસ ફરી એકવાર આ પિક્ચર જોયા પછી મારા મગજમાં ઘુમવા લાગી. વિજ્ઞાન તરીકે બાળકના જન્મથી લઈને એ બાળક મોટું થાય, એ બાળક તરુણ બને, યુવાન બને, પરણવા લાયક બને, પરણે, પરણે પછી પતિ પત્ની તરીકે રહે અને પછી પતિ પત્નીમાંથી માતા પિતા થાય અને એક બાળકનો ઉછેર કરે ત્યાં સુધીની આખી પ્રક્રિયાનું નામ સેક્સ એજ્યુકેશન છે એવું મેં ડોક્ટરેટ થીસીસમાં પુરવાર કર્યું અને એ થીસીસ NCERT ના ERIC દ્વારા પ્રકાશિત કરવામાં આવી આજથી ૩૫ વર્ષ પહેલા… આ ફિલ્મ અંગેની મારી વાત મને મહત્વની એટલે લાગે છે કે મેં પણ પ્રકાશ કોઠારીને ત્યાં રહીને મારા સંશોધનના મુદ્દાઓ ઉકેલ્યા હતા અને આ ફિલ્મના ડિરેક્ટર પણ પ્રકાશ કોઠારીના પુસ્તકની વાત કરે છે . પ્રકાશ કોઠારીની ફિલોસોફી ટાંકે છે કે હસ્તમૈથુન એ કોઈ પણ સંજોગોમાં પાપ અથવા તો ગંદુ કૃત્ય નથી અને એક દ્ર્શ્યની અંદર તો પ્રકાશ કોઠારીને પડદા ઉપર લઈ આવે છે અને એમની પાસે આ હકીકત બોલાવે છે.
હા, બીજા જે વિવેચકો હશે એને એવું લાગશે કે ફિલ્મમાં જે કોર્ટ દૃશ્યો છે તે આટલી હળવી રીતે દર્શાવી શકાય ખરાં?? અને એવું પણ લાગે કે, એમાં ભગવાન શંકર વચ્ચે ક્યાંથી કુદ્યા છે. આ બધી અવાસ્તવિક્તાઓ લાગે એવું છે. પણ હું તો માનું છું કે વિજ્ઞાનનો આ ગંભીર વિષય સ્પષ્ટ થતો હોય તો એટલી અવાસ્તવિક્તાઓને સ્વીકારી લેવામાં કશો વાંધો ન હોવો જોઈએ.
મને આખા પિક્ચરમાંથી એક પ્રશ્નાર્થ એ થયો કે આ પિક્ચરને only for adults કેમ રાખ્યું હશે ? હું જયારે ફિલ્મ જોવા ગયો ત્યારે ડોરકીપર કોઈ એક છોકરીને પૂછતાં હતા કે આધાર કાર્ડ લાવો અને આધાર કાર્ડ જોઈને એણે કીધું તમને ૧૮ નથી થયા ૧૭.૫ વર્ષ થયા છે એટલે તમે ટિકિટના પૈસા પાછા લઇ લ્યો. મને તો બહુ આશ્ચર્ય લાગે છે !! હું તો એવું માનું છું કે ખરેખર આને એડલ્ટ રાખવાની જરૂર જ નથી, જે ફિલ્મની અંદર એ દલીલ કરવામાં આવે છે કે શાળાની અંદર સેક્સ એજયુકેશન અપાવું જોઈએ એ ફિલ્મ શું કામ એડલ્ટ પૂરતી રાખવામાં આવી છે ? જો મને પૂછો તો હું તો આઠમા ધોરણથી લઈને બધા જ વિદ્યાર્થીઓને આ ફિલ્મ જોવા લઇ જવા જોઈએ એવી હિમાયત કરું. એ ન શક્ય બને તો બધા શિક્ષકોએ, આચાર્યોએ, સંચાલકોએ, માતા પિતાઓએ તો આ પિક્ચર અવશ્ય જોવું જોઈએ, જેથી કરીને સેક્સ અંગેના કોઈ પણ પ્રશ્નો ઘરમાં કે વર્ગમાં પોતાની સામે ઉભા થાય ત્યારે તેઓ જડસુ ન બને.
ભારતને જો આપણે કેટલીક માનસિક યાતનાઓમાંથી બહાર કાઢવો હોય તો યુવાનો ન સમજી શકે પણ કેવળ અનુભવી શકે તેવા કેટલાક પ્રશ્નોના જવાબ આવી ફિલ્મ દ્વારા આપવા જોઈએ એવું દ્રઢપણે મારું માનવું છે. વધુ વિશ્લેષણની આવશ્યકતા નથી. કારણ કે ‘સુજ્ઞેષુ કિં બહુના ?’
આ ફિલ્મ આપણે સૌએ જોવી પડે. હજુ પણ આ ફિલ્મને only for adult માંથી બહાર લઇ લેવી જોઈએ. આ Oh my god 2 નથી પણ હા, OMG2 કહે છે કે, Yes, I am for sex education.
આપણાં સંતાનોના ઉધામા Sex અંગેની અધૂરી સમજને લીધે છે. મા બાપ કે શિક્ષકો આ સમજ નથી આપતા એટલે આપણું સંતાન sexual experimentation તરફ વળે છે અને એમાંથી બને છે, ન બનવાનું.. મારે આ ફિલ્મના હીરો ભાઈ અક્ષય સાથે ઓળખાણ નથી કે નથી નિર્માતા સાથે પરિચય. પણ એક શિક્ષક તરીકે મને teenagers તરુણોને મુંઝવતા પ્રશ્નોનો પાક્કો પરિચય છે. તેથી તો મારું મંતવ્ય જાહેરમાં મુકું છું.
સ્વસ્થ ચર્ચાને અવકાશ હોય જ….. ભદ્રાયુ
