સ્વામીનાં અઢળક સ્વરૂપો અહીં છે, શ્રદ્ધાળુઓએ આપણા પ્રત્યેક અવતાર સાથે સ્વામીને નિહાળ્યા છે, અને તેથી તેને તે સ્વરૂપે નીરૂપ્યા છે… સાથેના ફોટાઓ પરથી તેનો ખ્યાલ આવશે.

જે વટવૃક્ષનું સાનિધ્ય જીવનભર સ્વામીશ્રી સમર્થ પામ્યા તે વટવૃક્ષ એમની જિંદગીનો milestone હતું. ત્યાં જ બેસવું, ત્યાં જ મૌન રહેવું, ત્યાં જ આત્મજ્ઞાન પ્રાપ્ત કરવું !! એ વટવૃક્ષ એટલું જબરું વિશાળ છે કે તેને સમગ્રપણે આવરી લેતું મંદિર અતિ ભવ્ય ભાસે છે. વળી, મંદિરને સજાવ્યું છે પણ ખૂબ જ પ્રભાવક શૈલીથી. પણ જ્યાં જાઓ ત્યાં વટવૃક્ષની કોઈ શાખા તો તમારું સ્વાગત કરે જ કરે..!!

મંદિરમાં ધસારો ખાળવા ને ભક્તો નિરાંતે બેસીને ધૂન ભજન કરી શકે તેવી વિશાળ પરશાળો પણ છે.

અન્નપૂર્ણા ભવનમાં સવાર સાંજ પ્રસાદ લેવા હજારો ભક્તો કતારબદ્ધ ઊભા હોય છે…કોઈ વિશેષ દિવસ ન હોય તો પણ દોઢ થી બે કલાક લાઈનમાં ઊભા રહેવું પડે ખરું !! હા, અહીં બધેય બે પ્રકારે દર્શન થઈ શકે : મુખદર્શન અને પૂર્ણદર્શન. દૂરથી કેવળ મુખ નિહાળી શકાય અથવા ખૂબ નજદીકથી પૂર્ણ મૂર્તિના દર્શન થઈ શકે.

આશ્ચર્ય એ વાતનું થયું કે આટલા સમર્થ સ્વામી રામદાસના પરિસરમાં પણ પોતાના મોટા ફોટા કે નામ કોતરવનારા છે !! તે દુન્યવી સમર્થીઓ પોતાની મોટી ચમકતી કાર પાર્ક પણ અહીં પરિસર માં જ કરે છે..!!

ઉતારાની, પાર્કિગની અને ભોજનની બહુ વિશાળ સગવડતા છે તે અવશ્ય આવકાર્ય છે.

સ્વામી સમર્થ રામદાસ નાં બન્ને સ્થાનકો ને પ્રેમથી નિહાળી એટલું લાગ્યું કે કોઈપણ આધ્યાત્મિક આત્માને પણ લોકો ધાર્મિક બનાવી દેવામાં પાવરધા છીએ. શ્રી મનના શ્લોકોને સમજો અને જીવનમાં ઉતારો તો ચોક્કસ સમજાય કે શ્રી સ્વામી સમર્થ આપણને આધ્યાત્મિકતા નો પથ દેખાડી ગયા છે,, આપણે આપણી અંદરની યાત્રા શરૂ કરવાની છે… બહારનાં કેવળ ધાર્મિક આભૂષણોથી જીવન સાર્થક થઈ શકે તેમ નથી. આ આધ્યાત્મિક આત્મા ખુદ કહે છે કે : #મૈં_ગયા_નહીં_યહીં_હું.

પ્રશ્ન થાય કે “શ્રી મનાંચે શ્લોક” ખરેખર શું કહે છે ?!?

થોડીક રાહ જુઓ તો ટુંકમાં સમજીશું.

#શ્રી_સ્વામી_સમર્થ_રામદાસજીનાં_ચરણોમાં_પ્રણામ-સાથે…

ભદ્રાયુ